ایڈمنسٹریٹر پرنسپل جامعہ اشرفیہ مولانا حافظ اسد عبید ازہری

﷽

تقریظ

          قرآن کریم سے پہلے اللہ تبارک وتعالیٰ نے  بہت سی آسمانی کتابیں نازل فرمائی ہیں،اور وہ کتابیں خاص خاص قوم کے لیے نازل کی گئیں تھیں ، لیکن قرآن کریم کو اللہ تعالیٰ نے عجیب وغریب عالمگیر معجزہ کے ساتھ پورے عالم انسانی کےلیے ہدایت بناکر نازل فرمایا ہے جس کی طرف اللہ نے قرآن کریم میں جگہ جگہ نہایت حسین تعبیرات اور تمثیلات کے ساتھ ارشاد فرمایا ہے ۔ حق ان کی طرف التفات کرنا اورفکر وتدبر کرنا ہے، کیونکہ قرآن کریم کے ذریعے سے ہی اللہ جل جلالہ کسی کو بلندی وشرف عطافرماتے ہیں اورکسی کونیچےگرادیتے ہیں جس کی طرف یہ حدیث مبارکہ راہنمائی دیتی ہے۔

عَنْ عُمَرَ بْنِ الخَطَّابِ رَضِيَ اللَّهُ عَنْهُ قَالَ: أَمَا ! إِنَّ نَبِيَّكُمْ صَلَّى اللهُ عَلَيْهِ وَسَلَّمَ قَدْ قَالَ : «إِنَّ اللهَ يَرْفَعُ بِهَذَا الْكِتَابِ أَقْوَامًا وَيَضَعُ بِهِ آخَرِيْنَ».(صحیح مسلم،کتاب المسافرین، ج۱،ص۲۷۲،رقم الحدیث۸۱۷)

حضرت عمر رضی اللہ عنہ نے فرمایا : اے لوگو! تم آگاہ ہوجاؤ کہ بے شک تمہارے نبی ﷺنے ارشاد فرمایا کہ ’’یقیناً اللہ تبارک وتعالی اس کتاب کے ذریعے سےکچھ لوگوں کو بلندی عطاکرتاہےاور دوسرے لوگوں کو ذلت ورسوائی سے نیچے گرادیتا ہے۔ ‘‘

جناب رسول اللہﷺکےاس ارشاد پرغورکرنے کی ضرورت ہے کہ دنیاکے اندراللہ عزوجل نے قرآن کریم کے ذریعے سے بہت سے لوگوں کو ایمان اورہدایت سے مالامال فرمایا ہے جن کے دلوں میں حق بات ماننے کی صلاحیت ہے، چاہے وہ لوگ حسب ونسب،مال ودولت کے اعتبار سے دنیا والوں کی نگاہوں میں بلندمقام پر نہ ہوں، مگراللہ کریم کی نگاہ میں ان کا مقام بہت بلند اور برترہے۔اس وجہ سے اللہ تعالیٰ نے اپنی کتاب کے ذریعے سے گمنام خاندان اور گمنام لوگوں کی اولادوں کو دنیا میں بھی حیرت انگیز عزت اور بلندی نصیب فرماتا ہے کہ  بڑے بڑے امراء اورحکام اور عہدے داران بھی ایسے لوگوں کے پاس گھٹنے ٹیک دیتے ہیںجس کا دنیا میں ہمیشہ سے مشاہدہ رہا ہےکہ کتاب اللہ کے ذریعے سے دنیا کے اندر یہ شرف وعزت ہےنیز جس کواللہ کریم نے کتاب اللہ کا علم عطافرمایا ہے اس کے مرنے کے بعد بھی دنیا کے اندراس کے نام لیوا موجود ہوتے ہیں اور اس کے برخلاف وہ لوگ جن کے دلوں میں ٹیڑھاپن ہے حق بات سمجھنے کے لیے تیارہی نہیں ہوتےاورجب ان کے سامنے قرآن حکیم کی بات پیش کی جاتی ہے تواس پر کوئی توجہ نہیں دیتے اوراس پراللہ تعالی نے عبرت کے لیے طرح طرح کی مثالیں بھی پیش فرمائی ہیں اور ایسے لوگ اندھے،بہرے کے ساتھ تشبیہ دی گئی ہے۔

ہم سمجھتے ہیں کہ آج بھی امت اسلامیہ کی شان وشوکت کا رازقرآن حکیم ہی میں پنہاہےاس کوپڑھاجائے،سمجھا جائے اور اسی کے مطابق ہرقسم کے فیصلے کیے جائیں اوران رازوں سے آشکارا کرنے ے لیے ہردورمیں اللہ تبارک وتعالیٰ نےرجالِ کار پیدافرمائےجنہوں نے ہر طرح سے امت کی راہنمائی کی اور انہیں عبادت وقیادت کے لیے ہمہ وقت تیار رہنے کی ترغیب دی۔

زیرنظرکتاب ’’روح القرآن‘‘از حافظ محمدصالح احمد اسی سلسلۃ الذہب کی کڑی ہے،جس میں جدید تقاضوں کو ملحوظ رکھتے ہوئے قرآن حکیم کے معانی ومفاہیم سمجھانے کی کوشش کی گئی ہے۔

یہ فاضل مصنف کی بہت عمدہ کوشش ہے۔ اللہ رب العزت اس کا نفع عام وتام فرمائے اور مصنف اور ان کے تمام مساعدین کو جزائے خیر عطا فرمائے۔ آمین

حافظ اسعد عبید

ناظم، جامعہ اشرفیہ ، لاہور