فضیلۃ الشیخ محمد عبد الحفیظ العمری

﷽

الحمد لله والصلاة والسلام على رسول الله …    وبعد :

بسم الله الرحمن الرحيم

الحمدلله رب العالمين والصلاة والسلام على سيدنا محمدخاتم الأنبياء والمرسلين وعلى آله وصحبه أجمعين ، وبعد :

        قرآن مجیدآخری آسمانی کتاب ہے جو اللہ رب العالمین کی جانب سے رحمۃ للعالمین صلی اللہ علیہ وسلم پر ہدی للعالمین  بناکر نازل کی گئی ہے،دور رسالت سے وقوع قیامت تک انسانوں کی نجات وسعادت اور فلاح وکامیابی اسی سےوابستہ اوراسی پر منحصرہے۔

خیروبرکت، رشدوہدایت اور علم وحکمت سےلبریز کتاب الہی سے استفادہ اوراس کی برکتوں سے فیض یاب ہونے کے لئے اس پرایمان لانے کے بعدسب سے ضروری چیز اس پرغوروفکرکرنا اور اس کا فہم حاصل کرنا ہے ،کیونکہ اس کے بغیراس پرعمل کیا جاسکتا ہے اور نہ اسےدستورحیات بنایاجاسکتا ہے اور نہ ہی اس کی تعلیمات کے مطابق سیرت وکردارکو ڈھالاجاسکتا ہے۔

          یہی وجہ ہے کہ نزول قرآن کے ساتھ ہی اس کی تفسیروتفہیم کابھی آغازہوا،اللہ رب العزت نے اس کے الفاظ کے ساتھ وحی کی دونوں قسموں وحی متلواوروحی غیرمتلوکے ذریعہ اس کے معانی بھی بیان فرمائےجسے تفسیرالقرآن بالقرآن اورتفسیرالقرآن بالسنۃ کہتے ہیں،پھرصحابہ کرام ،تابعین اورتبع تابعین نےنہایت خوبی کے ساتھ اس فریضہ کواداکیااوران کے بعدہردورمیں اہل علم قرآن کریم کےالفاظ کی تبلیغ کےساتھ اس کے معانی کو بیان کرنےاوراس کی توضیح وتشریح کرنے کی ذمہ داری بھی نبھاتےرہےاوریہ سلسلہ ہنوزجاری ہے اوران شاءاللہ تاقیامت جاری رہے گا۔

اللہ تعالی نے خدمت قرآن کے لئے اہل علم کے دلوں کو اس طرح مسخر کیا کہ انہوں نے دنیابھرکےلوگوں تک پیغام الہی پہنچانےکی ذمہ داری کو اپنے لئے باعث شرف اورموجب نجات سمجھتے ہوئے مختلف زبانوں میں قرآن کریم کی ترجمانی وتفسیرکااہتمام کیا اور مختلف ذرائع سے اس کے معانی ومفہوم کو واضح کرنے کا انتظام کیا۔

اردوخواں طبقہ پراللہ تعالی کا بڑا کرم ہے کہ اسلامی مواد عربی زبان کے بعد سب سے زیادہ اردو زبان میں موجود ہے،جس میں ایک قابل لحاظ حصہ قرآنی علوم کا ہے، برصغیرکےاہل علم نے اس میدان میں قابل قدرخدمات انجام دی ہیں، محترم حافظ محمدصالح احمدحفظہ اللہ کا مرتب کردہ30 واں پارے کا ترجمہ وتفسیر بنام “روح القرآن” اسی سنہری سلسلہ کی ایک روشن کڑی ہے، جس میں انہوں نے ہر لفظ کے حرفی ترجمہ، بامحاورہ ترجمہ اورتفسیروتاویل کو ایک ساتھ جمع کیاہے جو موصوف کےمطابق 150 سے زائد عربی امہات الکتب تفاسیر کا خلاصہ ہے۔

سہل اور عام فہم اندازبیان کے علاوہ رنگوں کے مناسب استعمال کے ذریعہ مرتب نے فہم قرآن کو مزید آسان بنانے کی کامیاب کاوش کی ہے جس پروہ یقینا مبارکبادکے مستحق ہیں۔

اللہ رب العزت سے دعاہےکہ مؤلف کی اس کاوش کو شرف قبولیت سے نوازے اوراسےقبول عام عطافرمائےاوراسے ان کے لئے صدقۂ جاریہ بنائے۔ آمین

وصلى الله على نبينا محمد وعلى آله وأصحابه أجمعين .

محمد عبد الحفيظ العمري

صدر مركز عباد الرحمن التعليمي والخيري- الهند

ومشرف تعليمي القلم انٹرنیشنل اکیڈمی-قطر